Voyance Menu Centurie I de 1 à 20

I,1
Estant assis de nuict secret estude,
Seul reposé sur la selle d´aerain:
flambe exigue sortant de sollitude,
fait prospérer qui n´est à croire vain.

I,2
La verge en main mise au milieu de Branches,
De l´onde il moulle & le limbe & le pied :
Un peur & voix fremissent par les manches;
Splendeur divine. Le divin pres s´assied.




I,3
Quand la lictiere du tourbillon versee,
Et seront faces de leurs manteaux couverts,
La republique par gens nouveaux vexee,
Lors blancs & rouges iugeront à l´envers.





I,4
Par l´univers sera faict un Monarque ,
Qu´en paix & vie ne sera longuement :
Lors se perdra la piscature barque,
Sera regie au plus grand detriment.

I,5
Chassez seront pour faire long combat,
Par le pays seront plus fort grevez :
Bourg & cité auront plus grand debat,
Carcas. Narbonne auront coeur esprouvez.

I,6
L´oeil de Ravenne sera destitué,
Quand à ses pieds les aisles failliront :
Les deux de Bresse auront constitué,
Turin, Verseil que Gaulois fouleront.


I,7
Tard arrivé, l´execution faicte,
Le vent contraires, lettres au chemin prinses :
Les conjurez XIIIj. d´une secte,
Par le rousseau senez lez entreprinses.


I,8
Combien de fois prinse cité solaire
Sera changeant les lois barbares & vaines :
Ton mal s´approche. Plus seras tributaire
Le Grand Hadrie recourira tes veines.


I,9
De l´Orient viendra le coeur Punique
fascher Hadrie, & les hoirs Romulides
Accompagné de la classe Libyque,
Tremblez Melites et proches Isles vuides


I,10
Sespens transmis en la cage de fer,
Où les enfants septains du Roy seront prins,
Les vieux & peres sortiront bas de l´enfer,
Ains mourir voir de fruict mort & cris.


I,11
Le mouvement de sens, coeur, pieds & mains,
Seront d´accord Naples, Lyon, Sicille
Glaives, feux, eaux puis aux nobles Romains,
Plongez, tuez, morts par cerveau debile.


I,12
Dans peu dira faulce brute fragile,
De bas en hault eslevé promptement.
Puis en istant desloyale & labile,
Qui de Veronne aura gouvernement

I,13
Les exilez par ire, haine intestine,
feront au Roy grande conjuration :
Secret mettront ennemis par la mine,
Et ses vieux siens contre eux sedition.


I,14
De gent esclave chansons, chants & requestes
Captifs par Princes & Seigneurs aux prisons :
A l´advenir par idiots sans testes,
Seront receuz par divines oraisons

I,15
Mars nous menasse par la force bellique,
Septante fois fera le sang espandre :
Auge & ruyne de l´Ecclesiastique
Et plus ceux qui d´eux rien voudront entendre.


I,16
faulx à l´estang ioncte vers le Sagittaire,
En son hault AUGE de l´exaltation,
Peste, famine, mort de main militaire,
Le siecle approche de renovation.


I,17
Par quarante ans l´Iris n´apparoistra,
Par quarante ans tous les iours sera veu :
La terre aride en siccite croistra,
Et grands deluges quand sera apperceu.


I,18
Par la discorde negligence Gauloise
Sera passage à Mahommet ouvert :
De sang trempé la terre & mer Genoise,
Le port Phocen de voiles et nefs couvert.

I,19
Lors que serpens viendront circuire l´are,
Le sang Troyen vexé par les Espaignes :
Par eux grand nombre en sera fait tare,
Chef suict, caché aux mares dans les saignes.


,20
Tours, Orleans, Blois, Angers, Reims & Nantes
Citez vexees par subit changement,
Par langues estranges seront tendues tentes,
fleuves, dars, Renes, terre & mer trembleront.